Stawizny parka
Najwjetša kamjenjowa zahroda Europy
Park błudźenkow we Wochozach je krajinowa zahroda, stworjena ze 7.000 skandinawiskich błudźenkow. We łahodnje formowanej pahórkatej krajinje rosće wjace hač 100.000 rostlinow wrjosa, kerčinow a drjewinow. W zhromadnosći z hoberskimi błudźenkami tworja tu w kóždym počasu fascinowacy parkowy wobraz w přeco nowych barbach a formach.
>> Park błudźenkow je dźěl mjezynarodneje kulturneje šćežki zahrodow, kiž zwjazuje něhdźe 30 parkow a zahrodow podłu wobeju stronow Nysy.
Skandinawiscy zapućowarjo
Zwotkel přichadźeja tute hoberske błudźenki? Hišće před 10.000 lětami zawodźěwachu mócne lodowe woršty daloke dźěle sewjerneje Europy. Lodowe masy pohibowachu so do juha a njewuwostajachu ničo, štož bě jim na puću. Cyłe hory buchu wotnošene a do šćerkow, pěskow abo hlinow rozmlěte. Jednotliwe kamjeniska wobstachu přećiwo tutej mocy. Lód suwaše je ze Skandinawiskeje do Łužicy. Łužiske hórnistwo wurywaše lětnje tysacy tonow tutych zabłudźenych kamjeniskow. W 1990tych lětach nasta ideja, z wuzwolenych kamjeniskow stworić parkowu krajinu.
>> Geologam poradźi so w 19. lětstotku, puće zabłudźenych kamjeniskow wuslědźić.
Sydom wobłukow parka
Wzmiće sej čas! Na 20 hektarow wulkim arealu móžeće sej sydom wobłukow parka wobhladać: kamjenjowu zahrodu, hatnu zahrodu, holansku zahrodu, wysoke bahno, lěsny jězor, skalnu zahrodu, Mału Skandinawisku. Na najwyšim dypku steji pólne znamjo. Wottudy maće šěroki wid do Łužicy. Dožiwjenje parka přez mosty a pahórčiny, nimo rěčkow a wódnych kaskadow, přez kamjenjowe zahrody a holansku krajinu započina a skónči so w modernym wopytowarskim centrumje.
>> Park błudźenkow we Wochozach zdoby sej mjeztym dwójce mjezynarodne wuznamjenjenje za parki a zahrody „Green Flag Award“.
Dyrdomdej w pusćinje
Trochu schowana w dole leži „Pusćina“, z lubosću zhotowjene dźěćace hrajkanišćo.
W dyrdomdejowej oazy z drjewa, hliny a kamjenja da so wulkotnje hrać a wočerstwić: na chribjetach błudźenkow ke krosnowanju, w labyrinće karawanserije a na hrajkanišću při wodźe kołowokoło studnje.
>> Pytarjo za pokładom kedźbu! W pěsku pusćiny su małe pokłady schowane. Móžeće je namakać
